អន្តរជាតិ៖ ជើងឯកបាល់ទាត់ពិភពលោកអាហ្សង់ទីនបានទម្លាក់ប្រេស៊ីលចេញពីតំណែងលេខ ១ នៃតារាង FIFA Ranking និងឡើងទៅកាន់កាប់តំណែងលេខ ១ ជំនួសវិញ ក្រោយពីមានគម្លាតនិងតាមពីក្រោយជាង ៦ឆ្នាំ។ 

អាហ្សង់ទីន បានឈ្នះជើងឯកពិភពលោកកាលពីឆ្នាំមុននៅឯប្រទេសកាតា បន្ទាប់ពីយកឈ្នះបារាំងយ៉ាងតានតឹងនៅវគ្គផ្តាច់ព្រ័ត្រ បន្តដណ្តើមពិន្ទុពីការប្រកួតមិត្តភាពអន្តរជាតិ និងឡើងទៅកាន់ចំណាត់ថ្នាក់លេខ១ ក្រោយយកឈ្នះប៉ាណាម៉ា ២-០ និងគូរ៉ាកាវ ៧-០ អំឡុងពេលសម្រាក FIFA Day ថ្មីៗនេះ។

ដោយឡែក ក្រុមជម្រើសជាតិបារាំងបានរំកិលមួយចំណាត់ថ្នាក់ ពោលគឺឡើងទៅកាន់ចំណាត់ថ្នាក់លេខ២ បន្ទាប់ពីយកឈ្នះហូឡង់ដោយលទ្ធផល ៤-០ និងជ័យជម្នះ ១-០ ទៅលើអៀរឡង់ក្នុងការប្រកួតជម្រុះ Euro ២០២៤ ខណៈប្រេស៊ីលធ្លាក់ដល់ចំណាត់ថ្នាក់លេខ ៣ ក្រោយចាញ់ម៉ារ៉ុក ១-០ ក្នុងការប្រកួតមិត្តភាពអន្តរជាតិ។ 

ក្រុមជម្រើសជាតិប៊ែលហ្សិកបន្តឈរនៅចំណាត់ថ្នាក់លេខ៤ តាមពីក្រោយដោយអង់គ្លេសឈរនៅចំណាត់ថ្នាក់លេខ៥ ហូឡង់នៅឈរលេខ៦ ក្រូអាតលេខ ៧ អ៉ីតាលីលេខ៨ ខណៈអេស្ប៉ាញ និងព័រទុយហ្គាល់ឈរបន្តបន្ទាប់ក្នុងចំណាត់ថ្នាក់កំពូលទាំង១០។ សាធារណរដ្ឋអាហ្វ្រិកកណ្ដាល ឬ Central African Republic ជាសហព័ន្ធទទួលបានលទ្ធផលល្អជាងគេក្នុងខែនេះ ដោយរំកិល ១០ចំណាត់ថ្នាក់មកកាន់លេខ ១២២ ពិភពលោក៕